Anu Dumada U Vuhan
Anu dumada’w vuhan du Iraya As karyal na ra na siyad’ payhudhuran, Akdawen nu tawul ku u kangay namen Du pitukuna a mangpeh su vuñitan.
An dumada’w vuhan Kumayat ta du tukun. Mangay ta mamidang Su vituhen sayad’ tuhus.
As an mahmes tanan’ apun Mangpeh tana su vuñitan Kanu manalasal a vituhen A yapu du hañit.
Lagañitan
An kayukay ku na ss kasayap ku na A abu su matudin a ngayan a mandena Su paynaynahahan ku a kararaw.
Am umhes aku’ava a kumita dimu Ta nawriw’ isayap ku aya di mandena Ta chitahen kuymu, prinsesa ku.
Mayvadiew aku’a lagñitan As kawnunut mu na diyaken. Ta may ta mangpeh su savung nu addao Du hardin du natayenep ku.
Apat sa’w panid ku a uyud a mavid Kasirniyan nu sehdang, Ispihu nu addao, Kavuyan mus’ apsek nu addao ku
Taaw Di Valugan
An kavuya kus’ taaw aya di Valugan Akmay lampn asul di’a vuyas’ pamandan. Ispihu nu maydak a demdem du thus, Iktuktu kun angu palak kud’ tanad’ tuhus.
An iktuktu ku’n dinu papan’ taaw aya Mawvung as marayi kan pandan’ nu mavuya Yahes kun angu palak ku du tanad’ mahawud A lablavan nu abkas, rumlak du mahawd.
Pamarin pa yaken su avang a mahni A sakayan ku mangay maychatani Machilyud akud’ riyes di Valugan A umrapit su tana kapnwan kayayakan.
Hapñit
An malatyat mavuya ku u hapñit du tuhus A sumayap du paytawan demdem a umhavas As dukagtin nanayahen kayvan a Du riryan yanan teseros na.
An yaken pa kunu hapñit sumduh du thus Masayas’ sumayap du kabwan didiwen As libre du paruparun’ minadpun, Du kademdeman, kabwan iñeyñenen.
Didiwen ku
Manumanuk akud’ makasayap Ta minaputut u panid ku Tangayen ku asul aya hañit Sayapen dan’ mayet, mahni su panid. As an mahep timañis tawul ku Mandidiew su pakasisiyan ku. Ah …. Ah ….
Du katidib ku du panid ku’aya Minawpas dana’wvuridaw nu araw, Rumyal dana sira’w vituhen; Tangayen ku mavid aya hañit A kapnuwan kayayak vuken a diyaken. As an mavak am tud mayparahmet Didiwen ku a tud maypayñen. Ah …. Ah ….
An mangu danaw araw kayayak? Yaken asa ka prison addao mu Achinanevan du tawul mu Chinadenan akun’ esperanza. Makedked, chinanban, di makvulaw As an mangu danaw kasayap ku Makanta su laji nu addao? Ah …. Ah ….
Du tuhus an dumada’w karaw, Didiwen ku a mayñen, marahmet, Didiwen ku a tud maypayñen, Didiwen maychamahpan, mayramway, Didiwen kud’ rakuh a pasnsiya, Ichatudah kus inulay mu. Ah …. Ah …. Chatudah kus’ mapsek a addao mu.
Addao
Akma su avid nu vuhan an mahep As kanu hanebneb nu mawyas a apun U kahanebneb nu aktuktu ku A makavuya su avid nu muyin mu. Inahahaw kwava’w kawara mu du viyay ku A tumuruh su tawul mu diyaken Sinu’a ku paru a di’a makadngey siya Su uyud awi’a masdep a chirin mu
Nu addao nu asa ka tawu U mañina dana du atavu Aran manguangus’ kasadit nu viyay Nu addao muyvuh a m umpapaw siya Tinuruh u addao mu Niyaya su angdet ku a mapapanmu niya Ta maychatani aku’ava du atu nu tana’ya Takwan rarayay ku’imu a manda du kadiman.
Du uras nu kayayakan kanu kangengsahan Matanuy an mana masadit a tiempo Mavidin ta a mayñud du promesa ta Takwan nu addao am uyud a makapamarin Yaten ava u umpendan du viyay ta Kararaw kahahep a ipachuhwahuk ta U kapya na pa siya nu Dios diyaten U kavidin na imu nu rarayay ku.
Ara Dinu Gadang Ku
Nu jinjin a vahay ku Am uyud a dekey An iyudi ku nihakaw ku’m Makakayan du vahay ku.
Uvi kanu paray, Dukay kanu wakay, Sudi, mayis, kanu kadwan pa
Ara dinu gadang ku A miyan si diyamante A uyud a mavid Tinuruh ni nanay?
Mapya’w kawnung ku siya Am alit na pa na’bu Ara paru dinu? Sinu paru makapanmu?
Magaradu
Makey aku magaradu Umununut du aradu An panda ku diya am mahnehah aku Du inavungan nu natu.
Yanan dan dan’ dadwa ka datiew Makanta akmay siwsiw An vuyawen ku’am hala, hala, hala Arava’w apuhen ku Arava’w inanahet ku Ta yaken patul du takey ku.
Track Name
Track Artist